الـــعـــطـــلـــة:
صراحة الا جينا نشوفو مابقاتش شي حاجة سميْتها
"العطلة" هاداكشي كان من كنّا حنايا بزاقيل صغار، كنتي تفيق بكري فالصباح
تشعل التلفازة تفرّج فالرّوسوم المتحركة.تبقا مقابلهم حتى يوصل وقت الغدا،
تاكل جوج دغمات وتخرج للزنقة تجري وتلعب مع ولاد الحومة شي ألعاب واقيلا
مابقاوش فهاد الزمان بحال دينيفري، البِيْ، الطرومبية، حابَة ... إلخ،
من
بعد يكون ختام العشية مسك وتلعبو شي ماتش ديال الكورة على درهم ولا جوج
دراهم الطايح كثر من النايض تبقاو تلعبو حتى تغرب الشمس والنتيجة
40-40 والفلوس ماعرت شكون خداهم، شوية تلقاو راسكم كاتلعبو قاش قاش
فالظلمة بدون شعور .. كايتفرتك المجمع وكل واحد كايمشي لدارهم ونتا كاترجع
لداركم تاكل سلخة ديال العصى وتغسل رجليك وتمشي تاكل ما قسّم الله، كاتبقا
عاوتاني تفرّج فالتلفازة حتى يدّيك النعاس، كاتعنس وفالصباح كاتفيق كاتلقا
راسك فبلاصك وعاوتاني كاتتعاود نفس الكاسيطة فالنهار التاني ...
حتى كايوصل
آخر يوم فالعطلة، كادوّْز داك النهار ثقييييييل وقلبك مزيّْر وكاتفكّر
فالخنشة ديال تمارين لي مازال مادرتي فيهم والو، كاتبقا نهار كامل ونتا
تلعب و التراب والوسخ و حالتك حالة ومع اللِّيل تدخل للدار جري ورايا نجري
وراك تاكل شي بركة بالزربة و تدخل تدوّْش وتعيط للواليدة تحك ليك ساعة تصدق
نادم علاش عيطتي ليها ههه تبقا عليك "البرهوش العطلة كاملة ونتا تجري شوف
كيف وليتي بحال الجرتيلة عمرك حليتي شي كتاب فهاد العطلة وتجبد معاك
"صلااااااي" ها التصرفيق ها القريص ها النتيف والشتيف هههههههههه، تخرج من
الدُّوش حمر بالعصى وكاتشوف راسك وليتي جديد ههههه، كاتمشي تقلب على واحد
المحفظة فين تالفة كاتبقا ساعة ونتا تقلب عليها كاتلقاها تجي تشوف عاوتاني
ماتلقاش المقلمة، عاوتاني ساعة ونتا تقلب عليها من تلقاها ماتلقاش
الستيلاوات، فين مشا الستيلو لحمر فين مشا الستيلو لزرق ، قلم الرصاص طار و
المسطرة مهرسة، كاتمشي للمقلمة ديال خوك تاخد ليه الستيلاوات ديالو
والمسطرة كذلك، وتحط ليه المسطرة المهرسة فالمقلمة هههههههههه، عاااد تبدا
تخدم التمارين، تبقا تشوف بعينيك ماتفهم والو، تهز دفتارك وتخرج تمشي عند
شي ولد جيرانكم كبير ولا شي بنت جيرانكم باش يخدمو معاك التمارين، كاترجع
للدار تاكل سلخة اخرى ديال العصى كاتتعشّى وتمشي لبلاصتك باش تنعس، ساعة
والو مايجيكش النعاس وتبقا حال عينيك وتشوف فالسقف كاتنعس معطّااااال، و
فاالصباح ماتنوض حتى تبقا خمسة الدقايق تلبس سروالك وتلبس كل تقشيرة فلون،
وتلبس سباطك وتمشي تجري للمدرسة توصل معطّل تلقاهم بادو يديرو النشيد
الوطني، كاتبقا واقف فالباب مع خوتك لي وصلة معطلين حتى يساليو
الموشتاهيدين من ترديد النشيد، عاد كاتدخل تاكل سلخة ديال العصى زعما
كايربِّيونا على المُواطنة وداكشي ههههههههههههههههههه .. وتبداو القراية
عاوتاني و پيييييس
.
‹جيل ذهبي›
